Laingaantu: henry T. Conzo
Date: 01 October 2024
Thu hmaihoi
Paul in Filipi khuate heh a hnemtu le amah (Paul) mithmaipha ngah ruaitu pawlpui tihnak heh thupi ngai in lar ruai i (v. 1).
Paul in a lai ngaanhnak songah Euodias le Sintekhe te pahnih heh thinlung hmunkhat in umkom tuhin thu cah i. Zaiman tifangin, anite heh thuthangpha zai ruai tuhin amah (Paul), Clement, le sangtumite, thawn a rohngai in napertute i. Euodias le Sintekhe heh rem dunlo manin paul in rem dun tuhin thu cah bangin ruatsak thil i. Bawipa thawn pehzom dunhnak ah ang thiam tuhin, khuaruahhar in um tuhlo in nung thiam tuhin, le kulsamhnak um ilekhaw anghnak thinlung thawn Pathian hnenah ngen tuh thute heh Paul in ngaan i. Ciatihin, Khrih Jesuh ah daphnak thawn Pathian in kilkhawl tuh thute ngaan i. Paul in Filipi khuate heh thangphat tlak le upat tlak thilbawn nuamhnak thinlung dim ruai tuh thu khai rel i.
Cen, amah (Paul) heh nung dan thiamzo thu rel i; โNainung in umdan khai thiam ing, farah in umdan khai thiam ing, hathnak petu Khrih songah zaizongza tiben ing,โ tiin, Paul in ti i. Filipi khuate heh Paul bawmhnak petu i ai, a kulhnak hnaktahin a hlaifuan in pe i (v. 18).
Hnuataber ah Paul in Khrihfa unau dangte le kumpibawi inn ai naper tute vaihlahnak thu in Filipi laikuat heh tawp ruai i.
Thu tlangpui
V. Paul in Filipi khuate heh, โI zirhnak hlun in le i nundan i cuung tuihโ ti (4:1-9).
- A. Thinlung hmunkhat zuam tuih, thuthangpha zai ruai tuhin naper zuam tuih (4:1-3).
- B. Ang tu ih, thinlung nem tu ih, donhar mahih, sawngen tu ih (4:4-7).
- C. A dik, a thiang, a daihkul, le thangphat a pethaitu thil te in ning thinlung dim tuseh (4:8-9).
- D. Paul in, โrong kham le rikaamโ nung dan thiam zo ing, tiin ti (4:10-13).
Relfiang hnakte
A. Thinlung hmunkhat zuam tuih, thuthangpha zai ruai tuhin naper zuam tuih (4:1-3).
4:1 Ningtu i hnemtu le i hmai hngalhnak i si, tiin, Filipi khuate heh Paul in ti i. Filipi khuaai sangtu mite heh Khrih Jesuh songlawihnak ah kompi ve tuh tihnak ruahsanhnak vumah sangkhohnak a naihnak thu heh Paul in a ling fangin thawngto in harsa a tuarhnak thin rimsuhnak pairuai tu thu, a hnemhnak thu ah ruat i. Ciamanin, โNing tu i hnemtu i siโ tiin, ti i. Filipi khuate heh Paul ai thu zirhhnak sangin Paul ai thazang pehnak bangin sangkho ngaiin a nung tlanghnak thu heh Paul in mithmaipha i ngah ruaitu pawlpui i si, tiin an i.
4:2-3 Euodias le Sintekhe te pahnih heh Jesuh Khrih daihhnak hlun in thinlung hmunkhat in umkom tuhin thupi deuhin thu cah i. Amahte karlak ah zaitu buaihnak um tiheh Paul in lar ruailo i, ikhalselai, amahte pahnih heh rem dumlo tiin, ngaisung thil i. Hlanlai (Paul te san dung) ah nupangte heh mihmailam ah suak in thurel tuh heh vo nai zelo i.[1] Euodias le Sintekhe te pahnih heh zaibang nupang tiin Paul in lar ruailo i. Ikhalselai, amahte heh Filipi pawlpui songah mi thupui ngai i thai tuh i. Saya Hrang Hmung [2] in Filipi laikuat relfianghnak ngaantute ngaanhnak sirhsan in Euodias le Sintekhe te pahnih thu heh a hniaai bangin ngaan i; Warren W. Wiresbes in Euodias le Sintekhe heh Pawlpui upa nupi veve tiin ti i. Cen, Barclay in tu Paulte san ah pumkhawm hmun biakinn nai tlanglo ai inn ah khawm tlang de i ai, Euodias le Sintekhe heh Filipi khuaai sangtu mite pumkhawm hmun inn naitute i thai tuh i, tiin ti i.
Euodias le Sintekhe rem dunlohnak thu heh amahte daihhnak bang dunlo manin thinlung hmunkhat thilo i thai tuh i. Zaiman tifangin, Paul in, Jesuh Khrih daihhnak hlun in thinlung hmunkhat tuih tiin, amahte daihhnakte sawn heh zamin, Jesuh Khrih daihnak sawnah thinlung hmuhkhat nai tuhin zuam tlang tuh thu forh i (v. 2).
4:3 Nang rinsantlak i naperpui tiin, aisu tuber rel nuamhnak linlo in Euodias le Sintekhe heh bawm ruai i (v. 3a). Ciatihai, remhnak tawlrel bawm tuhin pervo pehnak i manin, Filipi pawlpui songai rinsalhnak pakhatkhat ngawn i tuh i. Cen, Euodias le Sintekhe heh Paul in thuthangpha zai ruai tuhin kaimah, Clement, le sangtumite, thawn a rohngai in napertute i, tiin, lar ruai i (v. 3b). Hlan lai Filipi khua ai Pawlpui upate karlakah thinlung hmuthiam dunlohnak um ve i. Laivum minungte heh rem dunlo hnak heh kin daih hrimhrim de bang i. Pathian thu karhzai tuhhnak hrangah pawlpui / pawlkom songah remhnak heh a hampuiber i ai, minungte in ciami remhnak heh kin bawn benlo hnakber khai i.
B. Ang tu ih, thinlung nem tu ih, donhar mahih, sawngen tu ih (4:4-7).
4:4-7 Bawipa thawn pehzom dunhnak ah ang tuih, tiin velhnih nolh in rel i. Euodias le Sintekhe te pahnih thinlung hmudun thiamlo manin Filipi Pawlpui songah rem dunlohnak um tiin, a cungah ngaanzo ising. Laivum minungte pawlkom dunhnak ah kin sik fangin minungte heh mah thudaih hlawhtlinglo fangin thinlung hmudun thiamlo hnak khai suak thai i. Thinlung hmudun thiamlo fangin remdunlo hnak suak ai, rem dunlo fangin pawlkom (or) Pawlpui songah anghnak khai um thillo i. Paul in, Filipi khuate heh, Bawipaโi daihhnak hlun in thinlung hmunkhat in nung tlang tuih tiin, forh i (4:2). Pawlkom songah daihdan bangdunlo celcel um thai karlak songah, pakhat le pakhat vumah lingthiam hnak thawn thin nemhnak thinlung nai tlang in um tlang tuh thu rel i (4:5). Sangtu mite heh kin Bawipa jesuh Khrih kawi lehsal tuhhnak iang tlanghnak caan comneu songah rem neuin nung tlang tuh, ang ngai in nung tlang tuhin Filipu Pawlpui hnenah Paul in a laikuat songin cah i.
Paul in Filipi khuate heh khuaruahhar in um mahih, ning kulhnakte heh anghnak thinlung thawn Pathian hnenah ngen tuih, tiin, hnem i (4:6).Filipi Pawlpui songah thudaih hlawhtlinglo hnak manin thinlung hmunkhat in um tlang thil nawnlo, ciatihin, rem dunlohnak suak i. Minungte rem dunlo fangin anghnak khai um thil nawnlo i. Kin ang nawnlo fangin khuaruah harhnak thinlung naide i sing. Ciabang caanah kin kulhnak tu muanghnak le anghnak i. Kin hiangkim in ciami kin kulhnak, muanghnak le anghnak heh kin pe ben taktaklo i. Filipi Pawlpui ah rem dunlo hnak manin thihhar in um tlang tuh heh Paul in ngaihharhnak sang ngai thawn Filipi Pawlpui heh Pathian hnen sawn ah anghnak thinlung thawn sawngen tlang tuh heh forh i. Ciatihin, sawngenhnak thawn Pathian hnenah a ben tute heh minungte in kin cuan banlohnak daphnak le muanghnak kin nai thil tuh in Pathian in Khrih Jesuh songah kil khawl tuh i, tiin, Paul in Filipi khuate heh thazang pe i.
C. A dik, a thiang, a daihkul, le thangphat a pethaitu thil te in ning thinlung dim tuseh (4:8-9).
4:8-9 Thangphat tlak le upat tlak khuaruah, le thilbawnhnak in ning thinlung dim ruai tuih; Paul in Filipi khuate heh lungrual ngai in um zuam tlang tuh thu, le thinlung khuaruahhar in um caanah Pathian hnenah anghnak thinlung thawn ben thiam tlang tuh thute heh forh i. Paul le Filipi khuate heh pehzom dunhnak thuukngai nai i, tiin ruatsak thil i. Zaiman tifangin, โThangphat tlak le upat tlak khuaruah, le thilbawnhnak in ning thinlung dim ruai tuihโ tihnak ponkate ruatsak ilesing khaw, nun thutiam dunhnak ponka te i; thinlung khuaruah dikcang ngain thu ruat tlang tuh thu, le nuncan ziazapha in nung tlang tuh dan thute nun zirh dunhnak ponkate i. Filipi 4:1-9 songai thute sik ilesingkhaw, Paul in Filipi khuate heh thazang pehnak thute hnaktahin nun zirhdunhnak thute i. Ciatihin, thu a zirh fangin, kaimah (Paul) i nundan a cung tuihโ tiin, amah nuncan ziaza heh cungtlak i hnak heh ralpha ngai in zrih i (4:9). Paul in Filemon heh Onesimas cosang tuhin lai a kuat fangin, amah Paul heh Jesuh Khrih ai rinsan tlak naruaihtu i hnak heh lar ruai hmasa i (Filemon 1a). Cen, Filemon heh rinsantlak a naperpui i hnak lar ruai fawn i (Filemon 1b). Ciatihin, Filemon in Paul heh a cosang bangin Onesimas khai heh cosang ve tuhin thu cah i (Filemon 17). Filemon laikuat relfianghnak ngaantu Stephen E. Young in, โPaul in Filemon heh amah โ Paul โ nuncan ziaza le a khuaruah cuung in, Onesimas cosang tuh thu cah i โ tiin, ngaan i.[3] Laivum minungte, I nundan i cung tuihโ tiin, thu cuukdun heh thil bai ilo i, Ikhlaselai, Paul tu amah nundan cuung tuhin Filipi khuate heh nunthu tiam i.
D. Paul in, โrong kham le rikaamโ nung dan thiam zo ing, tiin ti (4:10-13).
4:10-13 Nung dan thiamzo ing; Nainung in umdan khai thiam ing, farah in umdan khai thiam ing, hathnak petu Khrih songah zaizongza tiben ing, tiin, Paul in ti. Paul in a cungah, โi nungdan i cuung tuihโ tiin, Filipi khuate nunthutiamhnak a rel ben ah, amah โ Paul โ heh, jesuh Khrih pehnak thazang in a vumai hlenghnak le a tawkhnak zaizongza vumah nung thiamhnak thu (amah nunhnak thu) rel i. Paul heh thuthangpha a phuanghnak manin (or) Jesuh Khrih a sanghnak manin harsahnak tam ngai tuar i (2:Korin 11:16-33). Ciatihin harsa a tuar hnak hmunah thanaulo in thuthangpha a phuang ben hlen i. Thuthangpha phuang tuhin khualtlawng a vakhnak thute sik ilesingkhaw zohsuamhnak le phiarhnak tampi tawkde khalselai midang thazang petu din hmun ah um ben pah hlen i (Nalangte 13-21:16). Rome ralbawite in thawngah a toh fangin khai thuthangpha phuang hlen pah i (Nalangte 21:17-28:31). Laivum minungte heh kin hlawh tling caah nungdan heh thiam thai tuh ising, ikhalselai harsa tawk taktak caah ah nundan thiam ing tidun tuh heh thil harsa ngai i.
[1] 1 Korin 11:5 songah nupangte mi hmailam ah dingin prophet bangin thurel heh pasalte mualpho ruai tiin Paul in ngaan i.
[2] Hrang Hmung 2016, Thukam Thar Simfiangnak: Filipi le Kolose hnenih cakuat, Herkio Commentry Series, Volume 16., Falam Baptist Pawlkom, pp. 126-27.
[3] Stephen E. Young, Our Brother Beloved: Purpose and Community in Paulโs Letter to Philemon, (Baylor University Press, 2021), 171-72.
