Laingantu: Saya Henry T. Conzo
Date: 28 April 2025
Efesa 5:
Efesa khanpui panga heh a cungai thu, (Nunhlun lon in nunthar sil tuih) thawn pehzom dun thotho i ai, ponka pha, ponka mawi, le nuncan ziaza mawi in nung tuh thute rel leh thio i. Paul in ciami thute a rel fangin hmanghnak ponka heh thukngai le huap kaungai, ‘Pathian bangin cang tum tuih’ tihnak ponka hmang i (Efesa 5:1). Sangtu mite Pathian bangin nung tuhin kin zuam fangin, thinlung pha ruahhnak pha, ponka pha, le nuncan ziaza pha nai tuhin zuam kulhnakte i ai, ciamite hmuahhmuah heh Pathian bangin cang tuh zuamhnak nunhnak i. Efesa khanpui 5 songah Paul in nupui le passal karlak ah ling thiam dunhnak nai in um tlang tuhdan thute in tawp ruai i (Efesa 5:21-33).
5:1 Ningtetu Pathian ai fahniang ning imanin, tiin, amahte ihnak heh Paul in porh (or) lar ruai hmasa i. Cia heh siarhnak nambat 3, le 8, ah a velhnihhnak not lehsal i. Ciatihin, Pathian minung ihnak lar ruaihnak heh sullam thupui ngai nai ruai i. (i) Efesa 4:17-19 rel fianghnak ah nganzo bangin, Efesa khuate heh Paul in thuthangpha rel fawmhnak, mi-piangthar ngom neuneu i. Cen, Foulkes in nganhnak sirhsan in Efesa pawlpuite dinhmun heh nganzo i sing: Amahte san laiah Efesa khuapui (ahlaice in Paul in thu rel bantawk pawlkom minungte), heh laivum dan ah diriam ngai in a nungtu, mi-piangtharlote nuncan ziaza in khuk (လွှမ်းမိုး) hnak pawlkom i.[1] Ciabang minungte karlak ah, minung tlawm neu in, ciami laivum dan ai nunghnak, nunhlun heh hlum in, Pathian minung a i hnakheh ralpah in nun pui ngam tuh thazang pehnak ponka i. Laivum minungte heh kin hiangai umtu mitamsawn ai ruahhnak (ပတ်၀န်းကျင်လွှမ်းမိုးမှု) in ukhnak minungte i sing ai, ciami elsan (လွန်ဆန် or ဆန့်ကျင်) zawng in nung tuh heh kin har ngai de i. (ii) Pathian ai fahniang ning imanin tiin, Pathian minung i hnak lar ruaihnak thupui ngai pahnihhnak tu: Amahte ihnak bangin nung tuh heh ralringhnak pe cih fawm i. A cungah Efesa khua dinhmun kin ngan bangin laivum dan ah diriam ngai in a nungtu, mi-piangtharlote nuncan ziaza in khuk (လွှမ်းမိုး) hnak pawlkom i. Ciabang in khukhnak pawlkom lakah Pathian minung i hnak nuncan ziaza heh nunpui tuhhnak ralring pehnak ponka i. Minungte mah ihnak bangin nunglo heh sual i. Santehhnak ah: Tlawngta in tlawng kailo in um heh sual i, tlawngta tu tlawng kai tuhhnak i.
Pathian bangin cang tuh zuam tuih: Pathian ihnak (atribute) heh phun tampui in relpha um i. Santehhnak te: Thil tibenhnak huham – Rauhla ihnak, nunhnak ihnak, bohnak nailo ihnak, Phathnak – Sualhnak nailo, Thianghlimhnak, dikcanghnak, dingfelhnak, sangtlak ihnak, tiin, Pathian ihnakte heh ralpha tam ngai um i.[2] Ciamanin, laivum minungte in Pathian bang tuhin zuam tuh fangin, Pathian ihnak (atribute) hmuahhmuah bangsio tuhin rel nuamhnak ilo tihnak heh fiang hmasa pha i. Hetaah Paul ai tumtekhnak tu, minungte pakhat le pakhat pehzom dunhnak hrangah hmang tuhhnak, Pathian ihnakte songai a phathnak, heh bang tuhin zuam ruaihnak i. Ciami Pathian ihnakte songai a phathnak (goodness) tu ithnak songah huap ngansio i. Sangtu mite dikcanghnak thillung nai in dingfelhnak nun, le thianghlim nun nai in a nungtute nunhnak ah Pathian hmuihmel lar de i.
5:2 Ithnak nun i: Hetaah, Paul in Pathian ai ithnak heh lar ruai hmasa i. Ciaben fangin ithnak in ning uk tuh seh, tiin zirh i. Ciami Pathian ai ithnak tu, “A nunhnak liam tian in laivum minungte ithnak” tihnak heh lar ruai i (Efesa 5:2). Ponka dang in rel ile singkhaw, ithnak tihnak a rel nuamhnak tu pehnak nun (sacrificial life) i. Mah daihhnak ian siklo in, midang zawn ruat thiamhnak nuncan ziaza i.
5:3-8 Pathian bang tuhin nunghnak nuncanziazate: Efesa 4:17-14 ah Pail in, Nunhlunte lon in nunthar le ziaza thar nai tlang tuhin thute heh a tlangpui thu in rel zianzo i. Cia heh Efesa 4:25-32 ah lon tuhhnak nunhlun le zir tuhhnak nun thar thute heh fiang ruai i. Cen, Efesa khanpui 5 ah, Pathian ihnak bangin nung tuhdante heh Paul in fiang ruai sinsin i.
5:3-5 Hetaah, Pathian ai minung ihnak tihnak heh notsal in rel leh thio i. A sullam tu, Pathian bang cang tuhin nung zuam tuh heh thupui ngai in forh nuamhnak tiin ruat sah thil i. Efesa 5:3 ah, Paul in sup tuhhnak (or) bawn tuhlohnak sualhnakte heh phunhnih larruai i. (i) Mitsih mawilo nupa sualhnak bawn tuhlo tiin ti i. Paul in pakhat le pakhat it dun tuhin rel ben ṭhiah ah, nupa sualhnak bawn tuhlo thu relbet i. Efesa laikuat rel fiangtu Foulkes in cia heh hetihin rel (ဝေဖန်) i: Pakhat le pakhat it dun tuih, tiin Paul in relhnak heh Efesa khuate in lang sual (or) hmang saul (abuse အလွဲမှတ်ယူ), ai nupa sualhnak heh sup nuamlohnak thinlung nai thai, tiin Paul in ruahsanhnak nai manin, nupa sualhnak bawn mahih, tiin a tel kherkher hnak i, tiin ruahhnak nai i.[3] Ciahlaiah, amahte san (Paul’s time) dungah tu nupa sualhnak heh sualhnak siava bawn tiin ruat hanglo i.[4] (ii) Pamhap thu rel nawn mah i: Efesa khuate lungput heh a cung (Efesa 4:17-19), rel fianghnak nganhnak ah larruaizo i. Thu rel thilhlo, thu cuk thillo, zawn ruathnak thinlung khai nailo i. Paul in hemi nunhlunte heh lon sio tuhin relzo i. Ikhalselai, hetahah tu, a rel khai rel tuhlo in kham rori i (Efesa 5:3). Heroditus relhnak sirhsan in Saya Khar Thuan in Efesa rel fianghnak ah he tihin ngan i: “Bawn tuhlo in khamhnak thu heh a rel khai rel tuhlo,” tiin, Persia te in Dan nai i, ti i. Laivum minungte heh hnihsa thuin (or) zing dun in a tun le tun pong ṭengṭohnak ponkate heh minungte ruahhnak songah taang hlen ruaihnak (or) bawn suak rori tuhin thinlung ruahhnak nairuaitu ah cang thai i.[5] Paul in, mitsih mawilo nupa sualhnak bawn tuhlohnak thu le pamhap tuhlohnak thute heh ven hnih not in thupui ngai in rel i (Efesa 5:3, 5).
5:6 Thu diklo in ning zawlngah maseh: Thudon relhnak le zirh sualhnak thu heh a pehzom dun i.[6] Paul in, thudon thu rel tuhlo in le ciami thudon thu (or) zirh sualhnak thute tu kehlam vorhlam ah lam kin pial ruaitu i, tiin zirhzo i (Efesa 4:14). Cen, Efesa 4:25 ah thudon thu rel mahih tiin forhhnak nganzo i. Hetaah, Paul in thu diklo thu in ning zawlngah maseh tiin, roh deuhin rel not leh thio i. Hemi thudiklo zirhhnak (or) thudon thu heh Paul in Efesa khanpui 4:14, 4:25, ah le 5:6 ah tiin, thupui ngai in zirh thil i. Pathian thudik zirhhnak hnawl ai thudiklo zirhhnak sawn hlun manin Pathian heh ciabang minungte vum ah thinraw i, tiin Pathian thinrawhnak thu rel fiang bet i (Efesa 5:6). Pathian in, Paofet pakhatkhat i ruailohnak thu heh i hmingin rel ilekhaw thi tuh i, tiin ti i (Luatsuakhnak 18:20). Profet Hananiah heh thudon thu rel manin thi i. Pathian thu tu, Babylon tein Judah mite heh pom tuh ai sal in hmang tuh, kum sawmsarih hnua fangin Pathian in Judah mite aosuak leh tuh, ti heh Pathian thu i (Jeremiah 29:10-11). Ikhalselai, rofet Hananiah in, Kumhnih songah Babylon kumpibawi Nebuchadnezzar heh Pathian in hnawm cawh tuh, Judah mite tu luathnak ngah tuh tiin, profet Hananiah in, thodon rel i (Jeremiah 28:3). Ciatihin Profet Hananiah heh thudon thu rel manin thi i (Jeremiah 28:17).
Thudiklo (thudon) a phunphun: Thu dikcang ling hlen ai dinpui nuamlo khai heh thudon dinpuitu i (Efesa 4:25 rel fianghnak nganhnak ah siar bet tu). Thu diklo a phunphun lak songah, thu dikcang ling hlen ai, dinpui nuamlo tu heh a laukul ber thudon i. Thu dik ling semkhim deuhlo manin dikcang deuhlo in rel le phuang heh thudon rel i. Mi ṭhenkhat in thu heh ruat cucalo, thu dik khai ling tum cello, ling fiang hlonglo, ciatihin thudiklo rel ngah thai i. Duhhamhnak thinlung nai manin thudik rello (thudon rel), tu khai um thai i. Thu diklo (thudon) heh a phunphun um i, a kon tihbang i ta in khai thilpha suahpui hnak thudon umlo i.
5:7 Thu diklo rel tute heh kom mah: Thukham Thar songah kom tuhlohnak minungte heh phun thum in lar i. (i) Pathian thawn pehzom dunhnak siatsuah ruaitute heh ralsan tuh. Ponka dang in rel ile singkhaw kom tuhlo (Matthai 10:34-37). (ii) Thu cuk thillo, thu rel thillote heh hnawl tuh (Matthai 18:15-17), Nupa sualhnak bawn tute (1Korin 5:2), El dunhnak thu heh pial tu (Titus 3:9-10). (iii) Tuhdon reltute (or) Thu dik ling hlen ai dinpui nuamlo tute (Efesa 4:7). A cungai relhnakte heh sangtu mite song in ciabang sualhnak a bawn tute (or) thu rel thillote heh rel nuam hnak i. Pathian linglotute in ciabang sualhnakte bawn ilekhaw hnawl tuhhnak ilo i (1Korin 5:10). Saya Khar Thuan in Bible thiam Stott ai nganhnak sirhsan in sangtu mite in kom tuhlohnak thu heh a hniaai bangin rel i: Sualhnak a bawn tute, le thu rel thillote heh kom mahin a tinuamhnak tu a minung hua dunhnak ilo ai, amahte ruahhnak ah telpui ve tuhlo, amahte thil bawnhnak ah tha peve tuhlo, amahte thurelhnak ah telpui ve tuhlo tiin a rel nuamhnak i.
5:8 Bawipa’i minung ning i zo manin tleuhnak songah um tuih: Paul in Efesa 5:1, 3, 8 songah Pathian minung ihnak heh velthum rori not sal in thupui ngai in lar ruai ṭiaṭo i. Cia heh, amahte ihnak bangin nung tuh heh thupui ngai in forh nuamhnak i tiin ruat thil i. Ciatihin Pathian minung ihnak lar ruai leh thio ai, tleuhnak songah nung tuhin forh leh thio i.
5:9-14 Tleuhnak songah nung tuih: Paul in tleuhnak songai nungtute heh, “phathnak hinkhim, dikcanghnak hinkhim, le thudik a suak ruaitute i,” tiin (Efesa 5:9), ah rel fiang i. Sangtu mite songai Rauhla heh Cimu bangin tuhhnak i. Rong Ci (seed) te tuh (plant) fangai khang vivo fangin thai suak (or) par suak de i. Ciabangin, sangtu mite songai Jesuh sanghnak thawmin cohnak Rauhla heh minungte mizia (character) ah cangai, ciami mizia heh nisiar nuncan ziaza (behaviour) ah lar suak de i.[7] Ciami nuncan ziazate heh dingfelhnak nun le thianghlimhnak nun tiin reldehnak songah huap ngah sio i. Foulkes in, “Tleuhnak tihnak sullam tu, Pathian ai songlawihnak huham, thianghlimhnak, le thudik” hemite lar ruaihnak heh tleuhnak tiin a rel nuamhnak i, tiin rel fiang i.[8] Tleuhnak lar ruaihnak heh a tlangpui in phunthum in lar ruai thil i: (i) Jesuh Khrih sanghnak manin nunmawi le ziaza mawi nai tute nunhnak ah Pathian songlawihnak lar ai Pathian heh thangpha tlak Pathian ah cangruai i (Filipi 1:11). Cia heh tleuhnak songah nung tihnak phunkhat i. (ii) Thudik (or) thutak ian rel (Efesa 4:25; compare tu 1Johan 1:1-6; 1Johan 3:10). Thudon rello, thudik dinpui ṭiotu heh tleuhnak songah nun tica i. (iii) Thil sual bawn ṭiolo (1Johan 3:9-10; Rome 8:5). Laivum minungte in thilsual heh bawn ngah thai i. Ikhalselai, tleuhnak songah umtute in thil sual heh bawn ṭiaṭolo i.
5:10 Bawipa ai anghnak si tuih: Efesa laubu rel fiangtu Liefeld in Pathian anghnak sidan heh phunhnin in lar ruai i:[9] (i) Pathian lungkhim puihnak i maw, i lo, ti heh ling fiang tum heh Pathian anghnak sidan phunkhat i. (ii) Pathian daihhnak i maw, i lo, ling thiam tumhnak khai Pathian anghnak sidan phundang leh thio i. Thukham Thar songah Pathian anghnak thute heh relpha um vivo i. Santehhnak ah, Sualsirtute vumah Pathian ang i (Luka 15:6-7). Jesuh hnuahlunte in khuasiate hnawt benhnak vumah Jesuh Khrih ang i. Hnuahlunte in Jesuh rinsan ngamhnak vumah Jesuh anghnak i (Luka 10:21; Matthai 11:25; Johan 11:41-42; compare Johan 6:29, 40). Ikhalselai, Efesa 5:10 ai Paul in rel nuamhnak Pathian anghnak tu, sangtu mite in laivum sualhnakte hlum ai, Pathian daihhnak sawn si thiamhnak nun, le Pathian lungkhimhnak sithiam in permer thiamhnak nun, cia heh Paul ai rel nuamhnak Pathian anghnak sithiamhnak nun i. Ponka dang deuhin rel ile singkhaw, dikcang ngai in nung le nun thianghlim ngai in nung heh Pathian anghnak si tihnak i.
5:11-14 Tleuhnak songah hlenpui tuih: Khuathim songai thil bawnhnakte heh tleuhnak songah hlenpui tuih, tihnak heh a cungai Pathian anghnak si tuih thihnak thu thawn pehzom dun i. Cen, Laivum dan in nung tihnak heh khuathim songah nung thawn a sullam bang pah ai a rel nuamhnak bang dun i. Khuathim songai thil bawnhnakte heh tleuhnak songah hlenpui tuih, tihnak heh poka dang deuhin rel ilesingkhaw, sualhnate heh phuang tuih (or) phorh tuih tihnak tluk i. Laivum minungte bawnhnak sualhnakte heh zapui ling thai tuhin rel phalo sualhnakte khai um thai i.[10] Santehhnak ah, nu le pa sualhnak bawnhnakte heh sual sirhnak thinlung kin naizo hnuaha rin mizapui ling thai tuhin rel le phuang tuh heh thil mawi ilo i. Ikhalselai, sualhnak ṭhenkhatte tu Pathian thu fehdan in sik fangin ian sualhnak lar ruai thil i. Santehhnak ah, Napang in pasal bangin in um (or) pasal in nungpang bangin um. Hebang sualhnakte tu Pathian thu (thudik) in, thu lairel in fiang ruai kul i.
Khuathim songai bawnhnak, sualhnakte heh tleuhnak songah hlenpui tuh tiin a rel nuamhnak tu, mizapui ling thai tuhin thulai relsah kulhnak ilekhaw Pathian thu fehdan vumah sirhsan in tawlrel tlang tuh tiin a rel nuamhnak i. Mizapui ling thai tuhin rel kullohnak sualhnak, rel phalo, phuang phalohnak sualhnakte ilekhaw, Pathian thu fehdan in ciabang sualhnak heh ling thiam ai tun hnuaah sualbet nawnlohnak heh Pathian thu tleuhnak songah hlenpui ti nuamhnak i.[11] Laivum dan in nungtute ruahhnak, le nuncan ziazate hmuahhmuah heh Pathian thu zirhdan in sik ilesingkhaw, zakthi kul sualhnak, tiin lar de i.
5:15-21 “Nunhlun lon tuh ai nunthar sil tuh” tihnak thu heh pehzom vivo lai ai, ciataah, thupui ngai in ling kulhnak pakhat tu Pathian Rauhla Thianghlim naper heh thulai reltuber i.[12] Mivoi bangin nunglo ai fimvar neu in le ralring ngain nung thiam tuhhnak thute heh Efesa 5:15-18 songah rel ai, Rauhla Thianghlim in dim dunruai ai Pathian thangphat tlang tuh thu heh Efesa 5:19-21 songah thupui in lar ruai i.
5:15-18 Mi voi bangin nung mahih, mifim bangin nung tuih tihnak thu heh bawn tuhlo in ralringhnak thu rel ai, ciami canca bawn tuhhnak thute rel fawm de i.
Santehhnak ah;
- a) Mivoi bangin nung mahih,
- mifim bangin nung tuih;
- Canpha ning naihnak heh hmang thiam tuih.
- Zaiman tifangin, kin san heh san sia i, tiin rel fiang i.
- b) Voi nawn mahih;
- Bawipa ai ning bawn ruai nuamhnak bawn tum tu sawn ih.
- c) Zu ri mahih,
- zu heh ning siatsuahtu i;
- Ciahnak tahin Rauhla in dim tu sawn ih.
5:15-17 Voi nawn mahih: A cungah Paul in thimhnak songai thil bawnhnakte heh tleuhnak songah hlenpui tuih, tiin rel i. Ciami tleuhnak tihnak heh linghnak (knowledge) le thianghlimhnak hmuhsak hnak in rel dehnak ponka i.[13] Saam labu ngantu in, Na thu tu i ke caah maikhuat i ai, i lampui caah tluehnak i, tiin ti i (Saam labu 119:105). Saam labu ngantu in, THU tiin, a tihnak heh linghnak thawn pehzom dun kul i ai, ciami linghnak thu tu, lampui caah tluehnak i. Voi nawnmah ih, tleuhnak songai thute heh fimvar neu in hmu thiam tuih tiin, Paul in a ti fangin thil pahnih heh bawn tuhin rel fawm i. (i) Amahte san heh san sia i, tihnak lingt thiam ai canpha a naihnakte heh hmang thiam tuh thu rel i. (ii) Bawipa in ning bawn ruai nuamhnakte heh ling thiam tum tuh ai bawn tum tuih, tiin Pathian daihnak semkhim ruai tuhhnak thu rel leh thio i. A cung Efesa 5:10 ah “Bawipa ai anghnak si tuih” tiin, a tihnak heh not lehsal i, tiin ruat thil i. Bawipa ai anghnak le Bawipa ai daihhnak ti heh a sullam bang dun ruai thil i. Laivum minungte heh kin daihhnakte kin bawnsah fangin kin lungkhim ai kin ang de i.
5:18 Zu rimah, Rauhla in dim tu sawn: Sangtu mite nunhnak ah Rauhla Thianghlim in dim tuh heh pakhat le pakaht thazang pe dunhnak ponka ian ilo ai, kin biahnak Pathian ai daihsakhnak khai i.[14] Sangtu mite nunhnak ai Rauhla Thianghlim tu Pathian ai ihnak hnikhnaihhnak i (Efesa 1:13). Ciamanin, ciami Rauhla Thianghlim heh thinhnawm ruai mahih, tiin ralringhnak relzo i (Efesa 4:30).[15] Hetaah, Paul in Rauhla Thianghlim heh thinhnawm ruai tuhlo tiin a relhnak heh bet deuh in, ciami Rauhla thawn dim ṭio tuhin rel i.
Saya Khar Thuan in Zuri le Rauhla in dim tihnak thu heh hetihin rel fiang i:[16] Zuri tihnak sullam tu Zu sawn in a dingtu minung heh uk tican i ai, Rauhla in dim tihnak sullam tu Rauhla in uk tihnak ca i. Ikhalselai, Zu in ukhnak minungte thil bawnhnakte tu, bualhnak, hnaihnokhnak, le mualphohnakte ian suahpui ai hnuataber ah hnawmcanhnak ah hlenpui i. Rauhla in ukhnak minungte ai thil bawnhnakte tu, nun mawi le nunpha in nung ruai ai thil pha ian suahpui i. Thukham Thar songah Paul in Rauhla in ukhnak minungte nuncan ziaza heh Galati 5:22-23 songah lar ruai i.
5:19 La thawn thangphat tuih: Sangtu mite hmunkhat ah taikhawm de fangin La sa tlang de i sing ai, cia heh a dan bang tluk ah cang i. Foulkes in tu, Khrihfate ciatihin la sa tlang dehnak heh kin anghnak larruaihnak i, tiin ti i. Cen, mibur umkhawm tlang fangin la sa heh Judah mite in khai hmang ngai ve i.[17] Judah nunphung kin ti fangin Khrihfa te in kin hlunhnak nunphung hampui i. Pawlkom dunhnak ah sa dehnak la tu pakhat le pakhat thzang pe dunhnak la, forh dunhnak la, le pum pehnak la (biahnak la ti nuamhnak deuh i), tiin, la a phunphun um ai, thinlung taktak in sahnak la thawn thangphat tuhhnak i.
Thinlung taktak in sahnak La: Thinlung taktak in sahnak la tu, a laponka (သီချင်းစာသား) heh kawk deuh kul i. Thinlung songai Pathian kihzah hlaice deuhhnak, Pathian phathnak kin tepngah hlaice can ai anghnak, kihkul le laukul tikcucan ai Pathian thu manin muanghnak, le a phunphun…, ciabang thute hmuahhmuah heh kin Laponkam (သီချင်းစာသား) bawn in lar ruai tuhhnak i. Ciaheh thinlung taktak in sahnak La i. Tunlai la puah dan thawn tu a langlet dunhnak khai um thai i. La ṭhenkhatte tu la-aw (သီချင်းသံစဉ်) heh bawn hmasa ai laponkam (သီချင်းစာသား) heh hnuata ah bawn leh tu khai um i. La pakhat suahpui thotho ai thangphathnak ah hmang tlang thotho i sing. Thinlung taktak in sahnak la tu la-aw um hlan ah laponkam (သီချင်းစာသား) um hmasa tuhhnak i. La-aw (သီချင်းသံစဉ်) bawn thiamlote in khai thinlung takin biahnak la, thinlung takin thangphathnak late heh sa thil i.
5:20-21 Khrih hmingin: Khrihfan sanghnak ah zaizongza heh Khrih thawmin i sio i ai, cia heh Pathian ai tumtekhnak hrimhrim khai i (Efesa 1:3-11). Paul in Efesa 5:20-21 songah Khrih hming bawn tuhhnak heh phunhnih in lar ruai i. (i) Pathian hnenah thangphathnak pe khai heh Bawipa Jesuh Khrih hming in thangphat tuhhnak thu rel i (Efesa 5:20). (ii) Ciahlaiah, Khrih upathnak manin, pakaht le pakaht it dun tuh khai rel i. Hemi thu pahnihte heh Khrihfa pawlkom songah a kulber hnakte hmuahhmuah huap ngahsio i, tiin ruat thil i. Pakhat le pakhat daihhnak hlun dun tihnak tu ang ruai dunhnak i. Anghnak thawn a dim mi pawlkom songah Pathian ai hmuifu khai co i (Nalangte 2:47).
Efesa 4:17-5:21 songai thupui in ruat phate: Paul in minungte nuncan ziaza kongcung thu, “Laivum mi bangin nung mahih, nunthar le ziaza thar nai tum tuih” tihnak thu heh, Efesa 4:17-5:21 songah fiang ngai in rel i. Ciami, minungte nuncan ziaza thu heh phunthum um i. (i) A dik le diklo linghnak vumah dikcang ngai in nunghnak nuncan ziaza. Dik le diklo tihnak thu heh Pathian thu sirhsan in lairel tuhhnak i. Santehhnak ah, Pathian in, nupang i, ti ilekhaw nupang tiin cosang kul i. (ii) Bawn suakhnak manin thil phalo suak tuhhnak ling thiamhnak thinlung naihnak nuncan ziaza. Santehhnak ah, kin ponghnak ponka pakhat manin kin nunaute Pathian thawn pehzom dunhnak hnawmcan ruaihnak ponka ilekhaw ciabang ponkate tu pong tuhlohnak tica i. (iii) Nunmawi mawi (or) nunnem ngai in nunghnak nundan, tiin laivum minungte nuncan ziaza thu heh phunthum in ruat thil i.[18] Hemi nuncan ziaza hmuahhmuah tu Rauhla Thianghlim naper vumah sirhsan in sio tuhhnak i.
C). Khrihfa innsang (5:22-6:9)
Laivum minungte nisiar nuncan ziaza ah Pathian minung ihnak heh nunpui tuh thu, laivum dan ai nung awnghnakte hmuahhmuah lon sio ai, Jesuh Khrih songah siamthar mi izo manin nunthar le ziaza thar nai tuhhnak thute heh Efesa 4:17-5:21 songah thupui ngai in zirh i. Ciami thute ben ah Khrihfa ingsangte nung tlang tuhdan relhnak thute heh Paul in Efesa 5:22-6:9 songah ngan leh thil i. Khrih le Pawlpui, heh pehzom dun bangin sangtu mite innsangah Pasal le nupui te heh ithnak le kihzah dunhnak thawn pehzom dun kul dan thute heh Efesa 5:22-33 songah fiang ruai i. Ciabang thotho in, Nu le pa, le fate, karlah ah pehzom dun bangin Bawi le Sal karlak ah lingthiam dunhnak, thu sang dunhnak, le kihzah upathnak thinlung thawn pehzom dun tuhhnak thute heh Efgesa 6:1-9 songah rel fiang i.
Innsang thu: Innsang tihnak tu laivum ah Pathian in thokhnak minungte pawlkom dunhnak hmasaber i.[19] Saya Khar Thuan in Efesa 5:22 ai innsang thu relhnak heh Jesuh sanglo tute hnenah relhnak ilo ai, Jesuh Khrih cosangzotute hnenah relhnak i, tiin, rel i.
Ciamai Innsang thawm in Pathian thu heh zirh dun sallawn vivo tuh heh Pathian ruahsanhnak ber i. (Sempanhnak 18:18-19; Danpesalhnak 4:10; 6:6; Saam labu 78:4). Innsang nupui le pasal heh Khrihfa veve selai phaber i ai, Rauhla thawn ukhnak innsang i tuh heh pha hlaice cuang lai i.
Efesa 5:22-6:9 songai thute heh a hniaai bangin fiangruai thil i.
- C). Khrihfa innsang (5:22-6:9)
- 1) Khrih le Pawlpui, Pasal le nupui (5:22-33)
- 2) Nulepa, le fate (6:1-4)
- 3) Bawi le Sal (6:5-9)
1. Khrih le Pawlpui, nupui le pasal (5:22-33)
5:22-24 Nupuite ning pasal daihhnak hlun tuih: Innsang nupuite in pasalte thu ngai tuh thu a cuk fangin, Jesuh Khrih heh Pawlpui luber ihnak fiang ruai hmasa i. Ciabangin, pasalte khai heh innsang ah luber i, tihnak rel i. Innsang nupuite in a pasalte thu ngai tuh tihnak thu heh tunlai san innsangte karlak ah khai thuharsa relpha um fuat de i.
Ciabang thuharsa ti nuamhnakte tu…,
- Pasal hmuahhmuah heh innsang ah thunaiber tihnak ca i maw?
- Nupang hmuahhmuah heh innsang ah thunaihnak umlo maw?
Innsang ah thu naihnak umdan heh nunphung thawn khai pehzom dun thai ai, sankhat hnua sankhat minungte khuaruah khangso dan thawn khai pehzom dun thai i. Ciamanin hebang thu heh rel harsa ngai thu pakaht i. Laivum dan ai nunghnak nunhlun te lon in Khrih songah nunthar le ziaza thar nai in nung tuh tihnak heh Rauhla Thianghlim vumah sirhsan in rel kul i tiin nganzohnak bang in, Innsang ah thunaihnak sangber thu rel tuh fangin Rauhla Thianghlim vumah sirhsan in rel kul i.
5:22 Nupuite, ning pasalte daihhnak hlun tuih (Pumpe dunhnak thinlung): Foulkes le Saya Khar Thuan te inEfesa laikuat rel fianghnak nganhnak laibu songah, Efesa 5:22ai, Paul in hmanghnak, “pasla daihhnak hlun tuih” tihnak ponka heh Greek pon ah umlo i. Ikhalselai, 5:21 ai ponka sirhsan in rel i, tiin rel kom veve i.[20] Cen, Zanniat Bible ai hmanghnak, “pasla daihhnak hlun tuih” tihnak ponka sik ilesingkhaw, sal te in a bawite daihnak heh hlunkul ngio bangin, nupuite in pasalte thu heh hlun kul tuh bangin um i. Thu naihnak heh thupuiber ah lar ruai ai, lauhnak thinlung thawn hlun kul ngio tihnak heh rel nuam deuh bangin um i. Ikhalselai, mirang Bible (NIV translation) ah tu, “Submit” tihnak ponka hmang ai, a rel nuamhnak tu, ithnak thinlung, kihzahhnak thinlung, le upathnak thinlung thawn pumpe dunhnak lam thupui deuh in rel nuamhnak ponka i. Ruaihnak heh ello in bawn sio tuhhnak lam ian rel nuamhnak ilo i. Kihzahhnak le upathnak thinlung nai tuhhnak rel nuamhnak i. Luka ngantu in, “Aisu khai ituseh i hlun nuam lekhaw amah daihhnak khiah hlum tu selai nisiar in a thinglamteh phur in i hlun tuseh.” (Luka 9:23). Paul in, Bawipa ai daihhnak ning hlun bangin (Efesa 5:22), tihnak sullam tu, “Bawipa hnenah pumpe dun bangin” tiin a rel nuamhnak i.
5:23-24 Khrih tu Pawlpui vumah thu nai bangin, pasal khai nupui vumah thu naitu i (Thu naitu ilo ai hotu tihnak sawn i): Khrih tu Pawlpui vumah thu a nai bangin tiin a rel nuamhnak tu, a cungah nganzo bangin, sangtu mite heh kin daihhnak hmuahhmuah hlum in Jesuh Khrih hnenah pumpe dunin, a hnuahlun kin cang i (Luka 9:23). Ciafangin, kin zaizongza ah kong kin hoitu heh Jesuh Khrih sawn i hang. Ponka dang deuh in rel ilesingkhaw, Jesuh Khrih heh sangtu mite vumah thu naitu bawi i hang. Jesuh Khrih heh sanghnak, rinsanhnak, kihzahhnak thinlung thawn pum pe dunhnak nun i. Caibangin, pasal in khai nupui vumah thu nai i (Efesa 5:23). Nupuite in, upathnak, kihzahhnak, rinsanhnak thinlung thawn pasalte konghoihnak hniaah pumpe dunsio in hlun tuhhnak i, ti ca i. Hetaah, innsang konghoi dunhnak lam thupui in relhnak i ai, pasalte heh inn sang konghoitu hotu tiin a rel nuamhnak i.[21] Thukham Hlun thuanthu songah Pathian in Israel mite konghoi dan sik fangin “Hotu” heh thupui ngai in ril de i. Santehhnak ah: Mosi le Joshua ril i (Luatsuakhnak 3-4; Joshua 1:1-9). Sinai mual ah Thukham pe tuh fangin konghoitute heh mizapui hmai deuhah feh ruai, tumce deuh in ril (Luatsuakhnak 24:1-2). Israel mite nelrawn ah vakvai tlang awng laiah mipum siar ruai fangin Mosi le Aaron bawmtu tuhin konghoitu ril ruai i (Mipum siarhnak 1:4). Israel mite thutiam ram (Canaan ram) a zem dun tlang fangin hotute ril in zem dun tlang i (Joshua 18:4; 19:51). Pathian konghoi dan heh hotu thupui ngai ril in a minungte konghoi de i.
5:25 Ithnak thu – Khrih in Pawlpui heh it bangin, pasalte in nupuite it tuhhnak i: Nupuite in pasalte daihhnak hlun tuh tiin rel ben ah, pasalte in nupuite it tuh thu rel leh thio i. Ciatihin a rel fangin, Khrih in Pawlpui vumai ithnak thu heh rel hmasa i. Jesuh Khrih in Pawlpui vumai ithnak tu a nunhnak liam tian in it i (Efesa 5:25).
Greek pon ah ithnak rel nuamhnak ponka heh pakhat hnakin tam um i: nupa sualhnak hiarhnak thinlung thawn ithnak rel nuamhnak poka heh eraō tiin ko ai, innsang ithnak rel nuamhnak ponka tu phileō tiin ko i. Efesa 5:25 ai rel hnak ithnak tu agapaō tihnak ponka hmang ai a sullam tu, zaitu thumanin ilo, a ittute in it hrimhrim, Pathian in laivum minungte ithnak bang ithnak rel nuamhnak ponka i.[22] Ciamanin, hetaah Paul in rel nuamhnak ithnak tu, nupuite in pasalte thu hlun manin pasalte in a nupuite it ve lehsal tuh, tiin rel nuamhnak ithnak ilo i. Nupuite hnen in ngah lehsal tuhhnak ruahsanhnak thinlung thawn it tuhhnak ilo, a thianghlimmi ithnak thinlung in it dun tuhhnak rel nuamhnak i. Ciabang ithnak heh Greek te in agapaō ithnak tiin ko i. Saya Khar Thuan in hebang agapaō ithnak tu sangtu mite ian in itdun thil i, sanglo tute in hebang agapaō ithnak nai thilo i, tiin ti i.[23]
5:26-27 Hetih ai a tihnak tu ti songah somcianghnak manin a thianghlimruai hnuaah a thu in Pathian hnenah ap tuhhnak i. ‘Ciatihin pawlpui tu a mawihnak veksen: a thiang le mawh nai lo, sawibang lo, ihlahle semkhim lohnak dang um loniu in amah hnen lala ah a hlengruai nuam manin i. Ikhalselai, siarhnak 26 ah, “Hetih ai a tihnak tu” tihnak ponka sik fangin a cung siarhnak 25 ai thu sirhsan in nganhnak bangin um khalselai siarhnak 25 ai relhnak ithnak thu thawn pehzom dunlo bangin um i. Siarhnak 26-27 ai thupui in a rel nuamhnak tu, som ciangzohnak i ai thianghlim ngai in Pathian hnenah ap zohnak manin, mawhhnak nailo, semhimlo hnak zaikhai umlo neuin amah Pathian hnen ah hleng ruai nuam manin i. Ponka dang deuhin rel ilesingkhaw, Pawlpui (innsang) heh, a thiangmi i tuh, a mawi mi i tuh, mawhhnak nailo mi i tuh, sawipha umlo in semkhim liang tuh, tiin a rel nuamhnak i.
Efesa 5:26 ai, “Somcianghnak” tihnak ponka heh Foulkes in hetihin rel fiang i. Khrih ai naper heh phunhnin in rel fiang thil i: (i) minung dan ai nunghnak nunhlunte hmuahhmuah a thisan in kin som ciang sah ai, (ii) Pathian mithmuh ah cosang tlak nunthar kin bawnsah fawn i, ti i.[24] Khrin heh thunaituber ah a dah thiamtu Innsang ah pasalte in nupuite heh it thiam ai, nupuite in khai pasalte heh upat thiam, kihzahhnak sangber thawn hotu dinhmunah dah thiam ilekhaw, ciabang innsang ah mawhhluk pha umlo ai, a thianghlim mi le a mawimi innsang tiin ko thil i. Ciabangin, Pawlpui songah khai Khrih heh thu naitu sangber ah dah thiam in pakhat le pakaht upat dun thiam tlang ai, kihzah dun thiang tlang ilesingkhaw, a thianghlim mi, mawhhnak nailo, sawipha umlo a semkhim mi le amah Pathian ai cosanghnak Pawlpui i tuh i.
5:28-33 Ithnak thu – Pasalte nupuite it tuih, tihnak thu heh not leh thio i. A notsal dan heh tlawm neu dang dun i, a cungah tu, “Khrih in Pawlpui a it bangin, ning nupuite it tuih” (5:25), ti ai, siarhnak 28 ah tu, “Ning mah le ningmah it dun bangin ning nupuite it tuih” ti i. Paul in innsang nupa it dun thu thu heh thupui ngai in zirh i. Minungte heh kin ruangpum kilkhawl dun bangin nupuite khai ithnak sangber thawn kilkhaw tuh thu rel leh thio i (Efesa 5:30). Minungte puangpum taksa khan pakahtkhat tuahmawh ngah pang ilekhaw, tasakhan dangte in tuarpui sio de i. Ciamanin, tasakhan dangdang um khalselai, tuarhnak ah bang dunsio i. Taksa ruangpum pehzom dun bangin Innsang pakhat, nupui le pasal heh pumkhat ihnak heh thupui ngai in lar ruai leh thio i (Efesa 5:31). Hetaah, pumkhat tiin a rel nuamhnak tu, ruahhnak pakhat sanghnak pakhat thinlung khat in um tlanghnak rel nuamhnak i. Innsang nupui le pasal heh taksa khan pehzom dun bangin pumkhat i hnak heh Pawlpui le Khrih pehzom dunhnak thawn san the leh thio i (Efesa 5:32).
Efesa 5:22-33 songah pasal in nupui vumai ithnak thinlung nai kuldan thupui dan heh, Khrih in Pawlpui vumai ithnak thawn santeh in fiang ruai ṭiaṭo i. Ciathihin, innsang ah nupui le pasal heh taksa khan pehzom dun bangin pumkhat ihnak heh thupui ngai in lar ruai ai, ciaheh Pawlpui le Khrih pehzom dundan thawn santeh in lar ruai ṭiaṭo i.
[1] Francis Foulkes, Ephessians: An Introduction and Commentary, Tyndale New Testament Commentaries-10., (InterVarsity Press, 1983).
[2] Pathian ihnak (God’s attribute) kin ti fangin, minun fimhnak in lingsio thilo hnak khai Pathian ihnak phunkhat thotho i. Paul I. Enns in, The Moody Handbook Theology, (Moody Publishers, 2014)., tihnak laibu songah Pathian ihnak heh phuntampui in relfiang i.
[3] Francis Foulkes, Ephessians: An Introduction and Commentary, Tyndale New Testament Commentaries-10., (InterVarsity Press, 1983), 140-41.
[4] Leon Morris, 1 and 2 Thessalonians: TNTC, Section edition, vol. 13, (Inter Versity Press, 1985).
[5] Khar Thuan, Thukham Thar Simfiangnak: Galati le Efesa, Hrekio Commentary Series, Second edition, Vol. 9., (MBC Press, Yangon: Chin Baptist Union, 2022).
[6] Thudon rel le zirh sualhnak thurel heh pehzomhnak um i, tihnak thu heh Efesa 4:14 le 4:25 rel fianghnak thute ah siar bet thil i.
[7] Francis Foulkes, Ephessians: An Introduction and Commentary, Tyndale New Testament Commentaries-10., (InterVarsity Press, 1983), 145-46.
[8] Ibid., 144.
[9] Walter L. Liefeld, Ephesians: The IVP New Testament Commentary Series-10., (InterVersity Press, 1997).129-30.
[10] Ibid.
[11] Ibid.
[12] Ibid., 131.
[13] Francis Foulkes, Ephessians: An Introduction and Commentary, Tyndale New Testament Commentaries-10., (InterVarsity Press, 1983), 149.
[14] Walter L. Liefeld, Ephesians: The IVP New Testament Commentary Series-10., (InterVersity Press, 1997).134.
[15] Rauhla Thianghlim thu heh Efesa 4:30 rel fianghnak ah semkhim deuhin siar thil i.
[16] Khar Thuan, Thukham Thar Simfiangnak: Galati le Efesa, Hrekio Commentary Series, Second edition, Vol. 9., (MBC Press, Yangon: Chin Baptist Union, 2022), 238.
[17] Ibid., 139.
[18] Austin Cline, “3 Types of Ethical Systems.” Learn Religions, Updated 11 June 2023, learnreligions.com/atheism-types-of-ethical-systems-4058406.
[19] Walter L. Liefeld, Ephesians: The IVP New Testament Commentary Series-10., (InterVersity Press, 1997).141.
[20] Francis Foulkes., 155.; Saya Khar Thuan., 244.
[21] Pasalte heh Innsang ah konghoituber tihnak heh mitamsawn in cosang thil i. Ikhalselai, nunphung ṭhenkhat ah le tunlai san minung covo (human rights), tihnak hlirdan lam in sik fangin, nupuite vumah pasalte thu naihnak sang deuh tihnak thu heh cosang thillo hnak um thai tuh i. Ciamanin, hemi Efesa 5:22 songai nupui le pasal innsang thu relhnak heh Khrihfate hrang relhnak i ai, Rauhla Thianghlim naper heh kin sirhsan tuhhnak i.
[22] Francis Foulkes., 157.
[23] Saya Khar Thuan, Efesa le Galati rel fianghnak, 249.
[24] Francis Foulkes., 158.