Laingaantu: Henry T. Conzo
Date: 27 September 2024
III. Paul in Filipi khuate ngaihhar hnak thu cah (2:19 -3:11)
A. 2:19-24 Timothy heh Filipi khua ah feh ruai tuh thu:
Paul in Timothy heh rinsan ngai i (2:20-22). Ciamanin, Filipi khua ai sangtute thu heh ling nuam ai, ciatihin a linghnak manin Paul amah heh thazang ngah tuh umlamhnak thawn, Timothy heh Filipi khua ah hlat tum i (2:19).
Filipi laikuat heh Paul thawngto tengah kuathnak (1:7) i ai, thawng a to tengah zai cangtuh (thi tuh maw nung tuh) tiin, thinhar in a um teng, tiin ruatsak thil i. Paul heh ciabang thinhar in a um tengah Filipi khuate hnenin thazang ngah tuh heh umlam ngai i (2:19). Filipi khuate heh Paul ai naper ah thazang petu taktak, bawmtu taktak tiheh lar i. Filipi khuate in paul ai thuthangpha hrang na a perhnak ah sumsaw in bawmhnak heh lar deuh i (1:5; 4:15-16). Ikhalselai, Paul in thazang ngahtuh umlamhnak a naihnak heh sumsaw bawnhnak ian ilo ai, thula ling dun, thula zadunhnak heh, Paul ai thazang ngahhnak, tiin ngaisung thil i.
Paul heh ciabang umlamhnak sang ngai thawn Timothy heh Filipi khua ah hlat tum khalselai, amah (Paul) thula zaibangin thil cang tuh ti fiang fangin hlat tum i (2:23). Ciatihai, amah (Paul) thula fiang fangin Timothy a hlat tumhnak thu ruatsak ilesingkhaw, Filipi khuate in khai Paul thula ling ve tuh heh Paul ai ruathnak i thai i. A cungah lar ruaizo bangin, Filipi khuate in Paul heh sumsawn thawn bawmde manin, Paul in thawngto hmunai a kulsamhnak te heh lingfiang hnua ah Timothy heh hlat in, a kulsam hnakte heh Filipi khuate in bawm leh tuh, ti heh Paul ai ruahsanhnak khai i thai pah i. Kontih bangkhai itatuseh, Paul le Filipi khuate (sangtu mite) heh pehzom dunhnak thuk ngai nai tlang ti heh lar i. Sangtu mite heh pakhat le pakhat pehzom dunhnak thukngai nai in thinlung hmunkhat, ruahhnak pakhat nai in umtlang ilesingkhaw kin Pawlpui, kin pawlkom thawn in Pathian heh songlawi de i.
B. 2:25-30 Epafroditus heh Filipi khua ah feh ruai leh thio:
Paul in Timothy heh Filipi khua ah hlat tuhthu a rel ben fangin (2:19-24), Epafroditus khai heh Filipi khua ah hlat tuh rel leh thio i (2:25). Paul in, Epfroditus heh, i bawm tuhin ning hlat awnghnak (2:25b), tiin, ti i. Epafroditus heh Filipi khuate in Paul bawm tuhin hlat ai, Paul hnenah caan tawkfang um hnuaah Paul in Filipi khuate hnenaah hlat leh bangin um i. Bible thiamte in Filipi laikuat heh Paul in Epafroditus phur ruai i, tiin um tlang i. Filipi rel fianghnak ngaahtu, William Barclay [1] in Epafroditus heh Filipi khuate ti i, Filipi Pawlpui in amah (Epafroditus) heh Paul thawngto haal (a kul sam hnakte um ilekhaw bawm) tuhin, Paul hnenah feh ruai hnak ti i. Ciatihin, Epafroditus heh Paul hnenah a um songah thi dawn tian ur i (2:27). Ikhalselai, Pathian ninghiohnak in nuncak lehai, a cak hnuaah Paul in Filipi khua ah hlat leh hnak tiin, ruatsak thil i. Paul in Epfroditus heh rinsan tlak naperpui tiin thupui ngai in lar ruai i (2:25, 30). Ciahlaiah, Epfroditus nuncak lehhnak heh lungsiahnak lian amam tuar tuhhnak luat, tiin iithnak le ngaihhar dunhnak heh thupi ngai in lar ruai leh thio i (2:27). Epfroditus heh anghnak thawn cosang tuhin Filipi khuate khai Paul in forh i (2:29). Paul, Epafroditus, le Filipi khuate thu ngaihven ilesingkhaw, amahte heh pehzom dunhnak thuukngai a naitlang hnak thu, iitdun ngai le ngaihhar dun ngaihnak thute heh thupui ngai in lar i.
Chapter 3:
C. 3:1-11 Ralring tuhhnak thucah: A pualam thil bawnhnak ah ilo ai, thinlung takin sanghnak manin midikcang le mifel ah kin cang i.
Paul le Filipi khuate heh pehzom dunhnak thuukngai nai ai, Paul in ngaihhar thawn Timothy le Epafroditus khai heh Filipi khua ah hlat hnak thute heh a cungah lai ruai zo i isng. Filipi 3:1-11 songah Paul in Filipi khuate heh sanghnak lam ah khongai in um tlang tuh thu, miphalaktla โ lenglam mithmuh thil bawnhnak vumah mifel le mithianghlim ah ruat duntute โ zan a tan tute, le thilsual a bawntute heh ralring tuhin thu cah i. A pualam thil bawnhnak manin thianghlim ah ruat dun tuh fangin tu, โPaulโ amah heh, midangte tahin niam cuanglo; Judah mite heh thianghlim deuh tiin, ruat dun tuh ilekhaw amah heh Bijamin hin i ve ai, Dan hlunhnak in Pathian hmaiah mifel tiin ruat dun tuh ilekhaw, amah heh Danthiam Farasi i ve tihnak thu heh rel i. Ikhalselai, Pathian mithmuhah ciabangte hmuahhmuah heh zaikhai i cuanglo ai, thinlung takin Pathian heh sang ai, Jesuh Khrih sanghnak ian heh Pathian hmaiah midikcang le mifel i danzia heh thupi ngaiin lar ruai i.
3:1-3 Paul in, โuicote heh ralring tuihโ โthilsual a bawntute heh ralring tuihโ โzarhtante heh ralring tuihโ kin tu A pualam bawnhnak ah zaikhai rinsanhnak nailo ising, tiin, ti i. Hetaah Paul in, โUicote heh ralring tuihโ tiin, a ti nuamhnak heh Judah mite rel nuamhnak, tiin ruatsak thil i. Bible songah โUicoโ heh Gential mite rel nuamhnak in khai ngaan de i. Gentile nupang nu hnenah Jesuh in, โFate pe tuhhnak rong heh Uicite pe awng im?โ tiin, Gentail mite heh Uico dinhmunah dah i (Mark 7:26-28). Bible thiam Struss [2] in Bible songai Uico thawn santehhnak te heh; (1) zohsuamhnak (or) hmuniamhnak, (2) Moses Dan zirhsual tute le sanghnak sual a pomtute tiin a ruathnakte khai heh Uico thawn santeh de ai, (3) Gential mite khai heh Uico thawn santeh de ti i.
Paul in Filipi khuate hnenai laikuat 3:2 songah โUicote heh ralring tuhihโ tiin, a ti nuamhnak heh Judah mite Khrihfa sanghnak zirhsual tute, (or) Khrihfa sanghnak heh Moses Dan thawn kopcih in[3] sangai fehpi tum tute rel nuamhnak ah Paul in โUicoโ thawn santeh in rel, tiin ruatsak thil i. Ciatihin kin ruat thilhnak heh phunhnih in sik tlang nga sing.
(1) Judah te heh Khrihfa sanghnak buai ruaitu trio: Khrihfa sanghnak heh Judah miphun le Judah Dan (Moses Dan) in luang suakhnak sanghnak i. Nalangte laibu songah, Jesuh vancung a kai hnua hnuahlunte thuanthu ngaihven fangin Peter le a rualpi mi zaimawzah in Jesuh heh sang tlang, khalselai, Judah mite a tamsawn in, ciatihai Jesuh a sanghnak heh amahte Dan pahbal tluk ah ruat tlang i. Ciami thubuai heh Jerusalem ah a rohngai in rel tlang awng i.[4] Ciahlaiah, Judah mite in Paul heh, โKin Dan thawn a kalh dunmi zirhhnak heh khuahacang ah zirh diamdo ai, kin Biakinn khai ningrim ruaisio iโ tiin, mawh hluk i (Nalangte 21:27-28). Ciatihin, Paul heh pom tlang ai, hnuataber ah ram ralkap kutah hleng i. Paul te san laiai Khrihfate sanghnak a hluntute heh โMoses Dan hlunlo, zarhtanloโ tiin, a rohngai in mawh hlukhnak um manin Judahmi Khrihfa sanghnak a hluntu zaimawzah in khai heh Moses Dan hlun in zarhtan kul tiin, a sangtu khai um awng i.[5] Ciatihin, Khrihfa sanghnak heh Judah mi zaimawzah in buaihnak suak ruai de i.
(2) Judah mite in a pualam bawnhnak rel tuh ilesingkhaw, 3:4-6 Paul in, โkai heh Judah mi ing, Dan hlunhnak le Dan thiam lamah Farasi ingโ tiin, amah le amah Judah mi le Judah Dan thiam a i hnak heh rel i. Paul heh minung lam dan in sik fangin amah le amah hngalpi tlak dinhmun i thai tuh i. Zaiman tifangin, โMidangte in thil pakhatkhat thuah porhdun ngam ilekhaw, i niam ve cuanglo, porhdun thilhnak naรฏve ingโ ti i (2 Korin 11:21). Cen, Judah mite in phiarai Rom ralkapte in Paul heh thir cihcin thawn khit ai vit tuhin thupe i. Paul in, โA thiamthu relhnak tikcu peloin Rom minung heh vit dan awm?โ tiin, ti i. Ciafangin, Paul vit tuhin thu a petu Rom ralbawi heh a thinlai i (Nalangte 22:29). Paul heh zai dinhmun cekci ti heh ling thiamlo khalselai, mimenma ilo ti heh ruat thil i. Ikhalselai, Paul in minung i hnak lamai a i hnakte hmuahhmuah heh zaikhailo ah ruat i. Ciamanin, โUicote heh ralring tuihโ tiin, a tinuamhnak tu Judah mite Khrihfa sanghnak zirhsualte, (or) Khrihfa sanghnak zai siarlotu Judahte heh rel nuam i.
3:7-11 Pathian hmaiah minungte dikcanghnak kin co thilhnak tu kin fel manin ilo, thilpha kin bawn manin khai ilo, Dan bangin zarhtanhnak bawn manin khai i cuanglo i. Khrih Jesuh heh ling fiangin, thinlung takin sangai amah Jesuh thawn pawlkomhnak kin naihnak manin sawn heh Pathian mithmuh ah midikcang kin canghnak sawn i (3:9).
[1] William Barclay, The New Daily Study Bible: The Letter toPhilippians, Collossians, and Thessalonians, (Saint Andrew Press, 2010).
[2] Mark L. Struss, Zondervan Exegetical Commentary on The New Testament: Mark, (volume โ 2), Clinton E. Arnold, general editor, (Zondervan Academic, 2014), 312.
[3] โKhrihfa sanghnak heh Moses Dan thawn kopcih in sangtuteโ ti nuamhnak tu; Jesuh thosalhnak a sangtute heh Moses Dan bangin zarhtan kul i, tiin a zirhtute rel nuamhnak i.
[4] Barton, BB, Taylor, L, Love, JR, Woods, L & Veerman, D 1999, Life Application Bible Commentary: Acts, Grant Osborne and Philip W. Comfort (eds), (Tyndale House Publishers, 1999), 247-53.
[5] Nalangte laibu songai Paul khualtawng a vakhnak thuanthu sik ilesingkhaw zarhtan le zarh tanlo thu buaihnak le Moses Dan kongcung thu el dunhnak buaihnak heh tawk vivo i.