Ruth cabu sungih Pathian thu part 4: Boaz le Ruth in fapa Obed an nei (4:0)

Ca ngaantu: Henry T Conzo
Date: 15^th January 2024

Ruth 4 sungih thupi: Boaz in an nunphung dan in Ruth kha nupi dingah a trhi

Ruth cabu natabiknak thu cu Boaz in Ruth cu nupi dingah a thri ih, cule fapa Obed an neinak thu a si. Obed cu Jesse ih pa a si ih, Jesse cu siangpahrang David ih pa a si. Ruth kha Boaz in nupi ding in a thri theinak ding ah Noami in a tawlrel sak ih, Naomi ih khua a khang sak vek in, Ruth khalin a tuah theh. Boaz khalin Hebrew nunphung hlir dan in Ruth ih tumtahnak hmuahhmuah a thei thiam cih ih, Ruth ih duhmi kimter dingah thu a tiam (Ruth 3:1-18). Boaz in Ruth hnen ah, “na duhmi hmuahhmuah kalo tuah sak ding (3;11)” tiin, thu tiam a pe, cu’i thu cu, a tlun (Ruth 2-3),comment ah kan ngaan zovek in, Ruth ih tumteh bik mi cu, “Boaz in amah Ruth cu nupi ding ah thri ding thu” kha a si.[1] Cumicu, Boaz khal in Ruth ih duhmi sut tullo in a thei thiam ih, “na duhmi hmuahhmuah kalo tuah sak ding” tongfang dang in kan sim asile, “nupi ding ah kalo thri tengteng ding sokhaw”, tiin, thu tiam a pe a si.[2] Boaz in Ruth cu nupi dingah thri ding in a timtuah ko nan veilekhat ah a thri cih lo, an mah Hebrew nunphung (or) Moses Dan vek in a tuah a si. Cumicu, Ruth chapter 4 sungah ka siar thei.

A khuasung mipawl le khua upa pawl tonkhawmnak ah Boaz in Elimelech ih songkhat pa cu a toter ve. Cule, khua upa le khuasong mipi hmai ah Elimelech ih sungkhat naideuh pa cu, Elimelech ih lao a zuar ih nangmah in na tlan ding maw?” tiin, a sut. Boaz in Elimelech ih sungkhat amah hnakin naideuhpa hnenah hitiih a sutnak sullam cu, Moses Dan ah, “Israel mi pakhatkhat a farah ruangah a leiram a zuar a si ahcun a nai bik a sungkhat in a leikir sal thei ding” (Leviticus 25:25), tiin, a um ruangah a si. Jeremiah ih paseu Shallum ih fapa Hanamel a lao ram zuar a duh ih Moses Dan vek in a tuah; an sungkhat naibik Jeremiah cu a lei ter ve a si (Jeremiah 32:6-7). Boaz in Elimelech ih sungkhat naideuh pa cu, Elimelech ih lao lei ding lawng a simlo ih, Moses Dan ih sungkhat truanvo hmuahhmuah khail lakcih ding in a sim. Boaz ih sim duh mi cu Elimelech ih laoram na lei ding a si ah cun, a thizomi, “Elimelech pafa ih nupi Ruth khal na thri cih a trul ve ding” ti duhnak a si. Ziang ruangah tile Moses Dan ih, “sungkhat truanvo” a ti duhnak sullam cu hi tiin a si, “Unau pahnih hmun khatah an um ih pakhat deuh cu fapa pakhat hman nei loin a thih ahcun a nupi cu an sungkhat sung siar lo a lengah pasal a nei thei lo ding; a pasal ih unau pa cun a ṭhit ding a si.” tiin, a um (Danpeksalnak 25:5). Elimelech ih sungkhat pa cun lao lei ding cu a lung kim nan, a thizo mi Elimelech fapa ih nupi Ruth thri ding cu a duhlo, curuangah, a ke dam cu cu’i lao a tlan duhtu Boaz hnenah a pek (Ruth 4:8). Moses Dan sungah a unau thizotu hrangah truanvo lak in a taanmi a nupi thri duhlo a si ah cun, cu’i a thizomi nupi in unau truanvo a lak duhlotupa ih kedam kha khua upa hmaiah laksak ding ih, “unau hrangah fa nai duhlotu” tiin, a mualpho ter ding, ti a si (Danpeksalnak 25:9). Elimelech songkhat pa khal in, an Dan ih sungkhat unau hrang truanvo theilo langternak ah a kedam cu Boaz – a ai a rol theitu – kha a kedam a pek ve a si. Ruth 4:7 sungah cun a tlunih Moses dan kan ngaanmi thawn cun a bangawk cekcilo vek in a um, asinan  sullam cu a bangawk tiin kan lak thei, Ruth 4:7 ih sim mi ah tla, “a leitu dingin a leilo le – truanvo a neitu in a tuah duhlo le – kedam peawk kha a si ve. Cuticun, Boaz in Ruth cu an mah nunphung dan takin nupi ding ah a thri (Ruth 4:10).

Ruth bung 4 sung ih ngaan mi thu hi Hebrew nunphung (or) Moses Dan in nupi thri awknak thu a si. Boaz in Ruth a thri tikah anmah nunphung dan kimten in a tuah thluk. Hitiih Ruth cabu sungih nunphung thu thupi zet in a tarlang mi sullam hi ziang a si ti thei fiang a har zet. Cabu kan siar tik ah a ngaantu ih tumtah mi thei ding hi a siartu hrang ah a thupi bik mi le a sifawn. A tang ih ngaanmi ah kan zohbet vivo pei.

An khuasung mipawl in Ruth cu fate tampi nai seh tiin thlawsuah a pek (Ruth 4:11). An khuasung mi pawl ih thlawsuah a pek tikih a tongmi tongfang kan zoh asile, “Judah le Tamar fapa Perez te’i innsang vek in hi nunaunu (Ruth) sungin Bawipa ih a lo pek ding mi fate pawl cu na innsang mawiter tu ah cang seh” tiin, thawsuah an pe (Ruth 4:12). Ruth cabu ngaantu in khuasung mipawl ih Boaz le Ruth thlawsuah a peh tik ah ziang ruangah, “Judah cithlah a telh kherkher” ti hi, kan theilo, nan ruahdan le hlir dan phun thun in kan hlir thei.

Ruth cabu tumtahnak a tlunah kan tarlang zo vek in; Cu’i kan tarlangzo mipawl cu, Pathian thu (theology) fehdan thawn kan ruat asile;

• 1) a ram, a miphun, a nunphung, le a biaknak pawl taan thluh ih a nung Pathian biatu ram ah feh tahartin, “cu’i miphun le an nunphung cu ka miphun le ka nunphun a si” tiin a lut awtu Ruth ih zumnak hi thupi zet in a tar lang.
• 2) Ruth vek ih an sinak hmuahhmuah taan ih a nung Pathian biatu miphun ah a lut tu pawl hmuahhmuah cu Pathian ih hril mi miphun (Israel) a silo khalle Pathian in a hnong cuanglo, tihi Ruth cabu ah thipi zet in a tarlang fawn.
• 3) Cule Ruth cabu in, Judah le Tamar ih sin siangpahrang David suahkehnak cithlah thu khal thupi zet in a tarlang, tiin, a tlangpi thu in ruah thaih a si.

Ruth cabu tumtahnak pathum kan relmi sungah, netabik a pathum (3) nak ih hmuhdan kha Ruth cabu commentary ngaantu tam sawn khalin a rel tel. Ruth cabu sungih thu a zate ka zoh asikhalle, a tlun ih pathun cu a huap thluh ih, natabi chapter 3 le 4 cu Hebrew nunphung (or) Moses Dan in nupi naiawknak thu a si ih, a cabu ih tumtahnak pathum kan rel zo mi sungah a pathum (3) nak hmuhdan thawn a nai awkbik tiin ruah theih a si.

---

[1] Himi thu hi, “Ruth cabu chapter 2-3 sungih Pathian thu” tiin, kan ngaan zo nak ah siar bet theih a si.

[2] Himi thu hi a tlun, Ruth chapter 3 comment ah siar bet aw.