Laingantu: Henry T Conzo
Date: Wednesday, 6 August 2025
James 1:19-27 Rauhla ao thaitu thu ian bawn tu
1:19-21 Thinraw tuhlo in tum tuih. Ciahnaktahin, Rauhla aothaitu thu heh khongai in awh tuih: I ithnak u le naute, he thu heh hih tu ngio ih: aisusu khai linghnak lam ahcen zualrang tu ilai pong tuh le thinrawhnak lam ahcen hnuakfual tu ih. 20 Minung ai thinrawhnak in Pathian ai tumtekhnak dikcang heh hlehsuah thil lo i. 21 Ciamanin ningdulkul le a rimmi ziaza pha lo hmuahhmuah heh lon tusek ih. Pathian hnenah ap dun tu ilai thinlung songai khumciahnak ning rauhla aothaitu thu heh kho ngai in awh tuih.
Thinraw ruaitu heh phuakhat hnak in tam um i:
- Kinmah veve manin thinraw: Thil bawnsual manin, hlawhtlinglo manin, tuahmawhdun ngah manin, le midang thawn pehzom dunlo in thinraw hnakte.
- Kin hiangai umtute in thinraw ruai: Linglo manin raw ngah ruai thil, thinraw tuh tihnak ling perpo in thinraw ruai.
Minung thinraw hnak heh satan hrang dawngkham hon sah thawn a bang dun i. Cen, minung thinlung khuaruah songah satan naper ilekhaw, Pathian tumtek heh dikcang ngai in hlenpui delo i.
Ciamanin, thinrawhnak in sualhnak songah lutpui tuhlo in supṭenṭo kul i (Efesa 4:26).
1:22-25 Luathnak petu thu heh ling menma ilo ai, a bawn suaktu heh hmuifu co tuh i: A thu kin za fangin tawk zo i ti menma in ningmah veve zawl dun mah ih. Ning zahnak heh bawnsuak tum tu ih. 23 A za ian za ai a bawnsuak lotu heh hlalang ah a hmel sikduntu bang i. Amah in hlalang ah a hmel sik dun ai a ihnak cekci in hmu i. 24 Fel ngai in sik dun hnuaah feh ai cammalak ah a hmel zaibang i ti ling nawn lo i. 25 Ikhalselai mi luatruaitu, semkhimmi dan heh fel ngai in a siktu ṭio heh a ling menma le a haitu ilo in a bawnsuaktu i; ciatihin a bawnsuak manin Pathian in hmuifu pe tuh i.
Thinlung ruahhnak phalote, le thinraw thai hnak thute heh lon ai Jesuh hnenah anghnak si thiamtu heh Pathian in hmuifu pe tuh i.
Bawnhnak tello sanghnak tu a thi i (James 2:17).
1:26-27 Pathian in a taktak le a thianghlim mi biahnak tiin ruathnakte: Biahnak lakah zuam ngai ing a titu um aw i sim? Ning hmurka uk ben hlah le i sikhaw ning sanghnak vumah ning zuamhnak heh santlai lo i ai ningmah veve a zawlduntu i si. 27 Pathian kin Pa in a taktak le a thiangmi biahnak ai a ruathnak tu: farah rimsu le hmaitongte harsahnak le amahte tuarhnak ah phatak niu in kilkhawl le laivum sualhnak songah niatdunruai tuh loin mah veve kilkhawlhnak khiah i.
Pathian in a taktak le a thianghlim mi biahnak tiin ruathnak tu:
- (i) Mifarah rimsu le hmaitongte kilkhawl
- (ii) Laivum sualhnak songah niatdun tuhlo in kilkhawl dun bentu